難為了運動員
我1991年入行做記者，第一份工作月薪$3500做快報的體育記者，做咗一年半，專門跟香港的雜項（當年除了足球以外，其他所有運動都叫雜項），做體育一定要同d總會搞關係，所以一定要去伊利沙伯體育館樓上拜訪佢哋（大部份總會寫字樓都在上面），同埋入沙田銀禧（依家叫做體育學院）。
香港體育界，同江湖社團冇乜分別，咁多年改變都唔大，由一個姓氏話事，「霍」家的影響好大，聽話的總會，會由一些委員操控，一代傳一代，當然聽話會多啲「阿公」錢多啲資源。
封建制度及階級觀念非常嚴重的香港體育圈，係香港發展體育運動的一個非常大絆腳石，我冇做咁多年體育記者，就算今日聽返啲行家及運動員講，情況係冇乜進步。
聰明的運動員會自己出嚟另起爐灶，但都要忌體育總會三分，遇啱啲小氣嘅總會話事人，會搞到你喺呢行冇得撈冇飯食，最終受苦都係運動員。
網絡媒體年代，我覺得只要運動員齊心，市民願意支持，其實可以係呢個年代改革香港的體育總會制度，釋放更多機會比未來的運動員。
不過，問題係，依家香港的體育圈勢力，已經比以前更加連結左阿爺勢力，如果冇估錯，可能兩三年之後我哋變咗大灣區體育聯隊，咁就仆街啦。
Search